Leggja þarf meiri áherslu á heildarmyndina í skipulagsmálum
25.02.2010
Upplestur á frétt 
Mjög góð mæting var á fund um þróun og framtíð miðborgarinnar sem haldinn var í Hafnarhúsinu í morgun. Fundurinn var hluti af fundarröð um endurskoðun aðalskipulags Reykjavíkur sem hleypt var af stokkunum í haust og sökum góðrar mætingar hefur Skipulags- og byggingarsvið Reykjavíkurborgar nú ákveðið að halda fleiri fundi á næstunni um skipulagsmálefni.
Formaður Skipulagsráðs Reykjavíkur, Júlíus Vífill Ingvarsson, ræddi í upphafi fundar almennt um áherslur í endurskoðun aðalskipulagsins 2010-2030 í sambandi við miðborgina og kom m.a inn á það hvernig brugðist hefur verið við þegar byggja þarf upp á svæðum eftir bruna í gegnum tíðina. Einnig fjallaði Júlíus um vinnu við stefnumörkun um gæði byggðar við endurskoðun aðalskipulagsins og eflingu tengingar gamla hafnarsvæðisins við miðborgina með tilliti til nýlegrar vinningstillögu Graeme Massie í hugmyndasamkeppni um Gömlu höfnina.
Því næst fjallaði Ólöf Örvarsdóttir, skipulagsstjóri Reykjavíkur, um forsögu skipulagsmála í miðborginni og endurskoðun þróunaráætlunar miðborgarinnar. Fjallað var um kosti og galla þess að vinna deiliskipulag afmarkaðra götureita og reifaði Ólöf hugmyndir borgarinnar um breytingar á því fyrirkomulagi. Varpað var fram spurningunni um hvernig miðborg við vildum byggja. Ólöf fjallaði einnig um vinnu við mótun borgarverndarstefnu í nýju aðalskipulagi og hugmyndir um hverfaskipulag til að minnska bilið á milli aðal- og deiliskipulags. Að lokum kom fram hjá Ólöfu að nauðsynlegt væri að verndun og uppbygging færu saman og standa þyrfti vörð um sérkenni og sérstöðu Reykjavíkur.
Sigrún Birgisdóttir, fagstjóri í arkitektúr við Listaháskóla Íslands, ræddi um sögu arkitektúrs í miðborginni, græn svæði og göngustíga meðfram strandlengjunni. Í erindi hennar kom m.a. fram að nauðsynlegt er að efla rannsóknir um starfsemi í miðborginni og efla um leið vettvang faglegarar umræðu.
Sif Gunnarsdóttir, forstöðumaður Höfuðborgarstofu, fræddi að því loknu fundargesti um það hvernig erlendir ferðamenn upplifa borgina. Samkvæmt gögnum Höfuðborgarstofu sækja 500.000 ferðamenn Reykjavík heim árlega og fer fjölgandi. Ferðamann leggja áherslu á þá upplifun sína að Reykjavík er örugg og hrein borg þar sem áhugavert er að kynnast menningu heimamanna, sækja veitingahús og heimsækja verslanir.
Snorri Freyr Hilmarsson frá Torfusamtökunum taldi að efnislegum gæðum hefði verið forgangsraðað framar síðustu áratugina á kostnað óefnislegra gæða eins og nándar og hlýju í samfélaginu. Fór hann yfir upphaf húsverndar í Reykjavík þar sem hún var tengd ýmsum málum er tengjast þéttingu byggðar. Snorri lagði á það áherslu í erindi sínu að í varðveislu felist jafnframt uppbygging og fjallaði einnig um ríkjandi vinnubrögð í skipulagsmálum með vinnslu áætlana eftir götureitum.
Páll Hjaltason arkitekt fjallaði um skipulagsmál síðasta áratugar í Reykjavík og hversu vandrataður vegur væri á milli húsverndunar og uppbyggingar. Páll taldi, líkt og fleiri, að nauðsynlegt væri að skoða heildamyndina frekar en að einblína á einstaka götureiti auk þess sem nauðsynlegt væri að setja spurningamerki við faglegan þátt í stjórnsýslu skipulagsmála.
Steinþór Kárason arkitekt ræddi um byggingarlist, borgarrými og borgina sem heild. Í fyrirlestri Steinþórs var kastljósinu beint að Óðinstorgi og möguleikum þess sem borgarrýmis.
Að fyrirlestrum loknum tóku við fyrirspurnir úr sal en vegna lengdar fyrirlestra var einungis hægt að taka við nokkrum fyrirspurnum fundargesta og svara þeim.
Áætlað er að halda fleiri fundi um svipuð skipulagsmálefni og verða þeir auglýstir síðar.