Reglur Reykjavíkurborgar um styrki

1. kafli. Markmið.

1. gr.

Reykjavíkurborg veitir ár hvert félagasamtökum, fyrirtækjum og einstaklingum styrki til starfsemi og þjónustu sem fellur að hlutverki sveitarfélagsins eða telst á annan hátt í

samræmi við stefnumörkun, áherslur og forgangsröðun borgaryfirvalda.

2. gr.

Markmiðið með styrkjum borgaryfirvalda er að styðja við sjálfsprottið starf, starfsemi frjálsra félagasamtaka og framtak einstaklinga sem stuðla að farsælli þróun borgarsamfélagsins, lífsgæðum og fjölbreytilegu mannlífi.

3. gr.

Alla jafna skal ekki veita styrki til kaupa á húsnæði heldur leitast við að styrkja og efna til samstarfs á grundvelli samninga (styrksamningar, samstarfssamningar, þjónustusamningar) um uppbyggilega starfsemi og þjónustu í samræmi við áherslur og forgangsröðun borgaryfirvalda.

2. kafli. Ábyrgð.

4. gr.

Borgarráð mótar almenna stefnu í styrkjamálum Reykjavíkurborgar og ákveður borgarstjórn við gerð fjárhagsáætlunar árleg framlög til styrkja. Borgarráð getur ár hvert samþykkt sérstakt áherslusvið í styrkveitingum næsta árs og ætlað fjármagn til styrkja á því sviði af styrkjalið borgarráðs.

Borgarráð fer með úthlutun styrkja, og gerð langtímasamninga, sem falla utan við verksvið fagnefnda borgarinnar. (Borgarráð getur þó falið einstökum nefndum að annast eftirlit og framkvæmd slíkra samninga.)

5. gr.

Fagnefndir Reykjavíkurborgar bera ábyrgð á meðferð styrkumsókna á sínu sviði, úthlutun styrkja og gerð samninga í umboði borgarráðs.

Einstaka fagnefndir skulu gera samþykkt um málefnaleg markmið og vinnulag í tengslum við úthlutun styrkja og samninga. Samþykktirnar skulu lagðar fyrir borgarráð til staðfestingar.

6.gr.

Skrifstofa borgarstjórnar fer með ábyrgð á umsjón styrkjamála miðlægt og styrkumsóknum sem koma til afgreiðslu borgarráðs. Í því felst m.a. mótttaka styrkumsókna, skráning, flokkun og vísun til fagnefnda, gerð heildaryfirlita og árleg auglýsing ásamt umsóknar- og kynningarefni á vef Reykjavíkurborgar.

3. kafli. Meðferð og afgreiðsla umsókna og styrkja

7.gr.

Við meðferð og mat á umsóknum skal viðhafa góða stjórnsýsluhætti, gagnsæi og vönduð vinnubrögð.

Meginreglan skal vera sú að þær umsóknir einar séu gildar sem berast innan tilsetts umsóknarfrests og uppfylla þær kröfur sem gerðar eru í auglýsingu.

8. gr.

Auglýst skal fyrir 1. september ár hvert eftir almennum umsóknum um styrki til Reykjavíkurborgar. Við það skal miðað að frestur til að skila inn umsóknum einn mánuður og úthlutun nefnda og ráða sé lokið í árslok. Í auglýsingu skulu koma fram upplýsingar um umsóknarfrest, forsendur styrkveitinga og nauðsynleg fylgigögn, auk annarra hagnýtra upplýsinga. Þá skal koma fram í auglýsingu að styrkveiting feli í sér að umsækjendur undirgangist ákvæði reglna Reykjavíkurborgar um styrki.

9. gr.

Umsóknum skal skilað á þar til gerðum eyðublöðum sem skulu vera aðgengileg á vef Reykjavíkurborgar www.reykjavik.is/styrkir og á stofnunum borgarinnar.

Auk almennra upplýsinga um umsækjanda skulu eftirfarandi upplýsingar koma fram í umsókn:

§ Markmið verkefnis eða starfsemi.

§ Tíma- og verkáætlun.

§ Önnur fjármögnun verkefnis eða starfsemi og gögn því til stuðnings

§ Aðrar upplýsingar, ef við á.

§ Hafi umsækjendur áður fengið styrki skulu liggja fyrir skilagreinar um nýtingu fyrri styrkja.

10.gr.

Umsóknir skulu metnar með hliðsjón af a) markmiðum sem lýst er og hvort líklegt sé að þeim verði náð; b) hvort verk- og tímaáætlun sé raunhæf; c) hvort unnt sé að meta framvindu verksins; d) hvort skilagreinar og fyrri verkefni sem styrk hafa hlotið uppfylli lágmarkskröfur; e) væntanlegum árangri og ávinningi fyrir umrædda starfsemi f) fjárhagsáætlun og greinargerð um aðra fjármögnun sem einnig skal fylgja umsókn.

Styrkþegum er skylt að skila greinargerð um ráðstöfun styrkfjár fyrir lok ráðstöfunarárs. Greinargerðinni skal skilað á sérstöku eyðublaði sem er aðgengilegt á www.reykjavik.is/styrkir og hjá stofnunum borgarinnar.

11. gr.

Framkvæmdastjórar fagnefnda leggja umsóknir fyrir nefndir með rökstuddri tillögu um afgreiðslu á grundvelli samþykktra markmiða og vinnulags viðkomandi nefndar.

Skrifstofustjóri borgarstjórnar annast meðferð þeirra umsókna sem koma til afgreiðslu borgarráðs og leggur rökstuddar tillögur fyrir ráðið. Ef stuðst er við umsagnir undirnefnda eða ráðgefandi aðila skulu þær umsagnir jafnframt lagðar fram.

Tilkynna skal öllum umsækjendum skriflega um afgreiðslu styrkumsóknar og hvenær styrkur kemur til greiðslu, ef hann er veittur.

12. gr.

Styrkveiting gildir fyrir næsta fjárhagsár. Viðburðir eða verkefni eru ekki styrkt eftir á.

Styrkveiting felur ekki í sér fyrirheit um frekari skuldbindingar af hálfu Reykjavíkurborgar nema gerður sé sérstakur samningur þess efnis.

Nefndir skulu leggja styrkjasamninga, sem taka til lengri tíma en eins árs fyrir borgarráð til samþykktar.

13. gr.

Reykjavíkurborg áskilur sér rétt til að rifta samningum, afturkalla styrkloforð og/eða krefjast endurgreiðslu ef sannanlega er um forsendubrest eða vanefndir að ræða af hálfu styrkþega.

14. gr.

Styrkir allt að 1 mkr. skulu greiddir í einu lagi, styrkir á bilinu 1-2 mkr. í tvennu lagi, styrkir á bilinu 2-3 mkr. í þrennu lagi, en hærri styrkir ársfjórðungslega. Sama gildir um greiðslur vegna styrksamninga. Greiðslur fara fram 16.-18. mars, júní, september og desember.

15.gr.

Fagnefndir skulu leggja yfirlit veittra styrkja fyrir borgarráð til kynningar eins fljótt og auðið er. Þær annast jafnframt almenna kynningu á styrkveitingum hver á sínu sviði.

16.gr.

Styrkþegar skulu gera grein fyrir því í árslok hvernig styrkfé hefur verið varið.

Framlög Reykjavíkurborgar sem veitt eru í formi aðstöðu og/eða húsnæðis skuli metin skv. reiknireglum borgarinnar um innri leigu og gerð grein fyrir þeim ásamt öðrum styrkjum á viðkomandi starfsári.

Þeir aðilar sem njóta styrkja frá Reykjavíkurborg skulu láta þess getið í kynningarefni sínu.

4. kafli. Gildistaka

17. gr.

Reglur þessar taka gildi frá og með samþykkt í borgarráði og falla þá úr gildi eldri reglur samþykktar af borgarráði 11. nóvember 1997.

Samþykkt í Borgarráði 9. september 2004.

Greinargerð

Tillögur starfshópsins hafa að markmiði að koma á samræmdu vinnulagi/reglum í úthlutun styrkja Reykjavíkurborgar og tryggja eftir föngum aðgang og jafnræði við ráðstöfun skattfjár borgarbúa. Jafnframt eru tillögurnar til þess fallnar að auka festu í vinnubrögðum við úthlutun styrkja.

Nýmæli í Reglum Reykjavíkurborgar um styrki, dags. 7. september 2004, felast einkum í eftirfarandi:

Umfjöllun og afgreiðsla styrkja og saminga verður í vaxandi mæli á vettvangi fagnefnda

Aukin áhersla verður á samstarfssaminga/styrksamninga sem falla að markmiðum og forgangsröðun Reykjavíkurborgar og einstakra málaflokka. Gert er ráð fyrir að slíkir samningar feli í sér ítarlegri ákvæði um mat á árangri, eftirlit og önnur atriði sem leiða af skyldum þeirra sem ráðstafa opinberu fé.

Almennt verði ekki veittir styrkir til kaupa á húsnæði heldur verði leitast við að styrkja og efna til samstarfs um starfsemi og þjónustu í samræmi við áherslur og forgangsröðun borgaryfirvalda. Starfshópurinn telur jafnframt eðlilegt að ekki sé gerður greinarmun á styrkjum eftir því hvort þeir eru til almenns reksturs eða reksturs fasteigna. Fyrrnefndu styrkirnir eru nú afgreiddir af fagnefndum en hinir síðarnefndu af borgarráði.

Í tillögum starfshópsins er gert ráð fyrir því að styrkumsóknir berist skrifstofu borgarstjórnar sem beri miðlæga ábyrgð á móttöku styrkbeiðna og vísun þeirra til afgreiðslu fagnefnda eftir því sem ábyrgð þeirra stendur til. Skrifstofa borgarstjórnar standi vörð um samræmd vinnubrögð og hafi heildareftirlit með meðferð og afgreiðslu styrkveitinga Reykjavíkurborgar. Hlutverk og ábyrgð málaflokka er jafnframt skilgreind í reglunum auk þess sem sérstök tillaga er gerð um að borgarráð feli fagnefndum að gera samþykktir um eigin styrkveitingar til fyllingar almennum reglum Reykjavíkurborgar.

Þróun styrkveitinga

Fjármagn til styrkveitinga hefur haldist lítið breytt undanfarin ár. Fjárhagsrammi menningarmálanefndar var hækkaður árið 2001 vegna leiklistarstyrkja og eins hafa orðið tilfærslur innan ramma einstakra nefnda. Hjá félagsmálaráði, menningarmálanefnd og ÍTR er greinileg aukning á húsnæðisstyrkjum sem rekja má til innri leigu sem er tilkomin vegna breyttra reikningsskilareglna sveitarfélaga. Starfshópurinn telur ekki tilefni til að gera greinarmun á styrkjum eftir því hvort þeir fari til almenns rekstrar eða rekstrar fasteigna. Fyrrnefndu styrkirnir eru nú afgreiddir af fagnefndum en hinir síðarnefndu í borgarráði. Því er lagt til í Reglum Reykjavíkurborgar um styrki að styrkumfjöllun og styrkveitingar sem verið hafa hjá borgarráði og lúta að rekstri fasteigna flytjist til hlutaðeigandi fagnefnda ásamt tilheyrandi fjármagni.

Heildarstyrkveitingar á árinu 2003 námu 2.838 mkr. og er þá miðað við styrki, samstarfssamninga, rekstrarframlög og þjónustusamninga. Stærsti einstaki styrkjaliðurinn, 516 mkr. var til húsnæðis- og æfingastyrkja íþróttafélaganna samkvæmt reglum sem íþróttafélögin hafa komið sér saman um á vettvangi Íþróttabandalags Reykjavíkur (ÍBR). Að auki eru veittar 80 mkr. í styrki til byggingar íþróttamannvirkja og 27 mkr. runnu til reksturs ÍBR. Um 26 mkr. að auki var varið til ýmiss konar íþrótta- og tómstundastarfsemi. Alls var því varið um 767 mkr. til margvíslegs starfs sem tengdist íþróttafélögum borgarinnar á árinu 2003.

Á árinu 2003 var 600 mkr. varið til styrkja á sviði menningarmála. Ríflega helmingur þess fjár liggur í stuðningi við stofnanir og launagreiðslum til atvinnulistamanna. Tæpur helmingur eða 232 mkr.er samningsbundið framlag Reykjavíkurborgar til Leikfélags Reykjavíkur sem er stærsti einstaki styrkþegi Reykjavíkurborgar. Framlag Reykjavíkurborgar til reksturs Sinfóníuhljómsveitar Íslands á árinu 2003 nam 80 mkr. Alls námu húsnæðisstyrkir vegna menningarmála 186 mkr., að stærstum hluta vegna Borgarleikhúss. Því styrkjafé sem menningarmálanefnd ráðstafar að öðru leyti er að mestu varið til stuðnings við listamenn, fyrirtæki þeirra og félög gegnum starfssamninga til þriggja ára.

Styrkir leikskólaráðs og fræðsluráðs eru að verulegu leyti til ýmissa rannsókna og þróunarverkefna í málaflokkunum. Almennir styrkir fræðsluráðs eru um 25 mkr., auk þróunarsjóðs grunnskóla sem nemur 8 millj. kr., alls 33 mkr. Þess má geta að framlög til tónlistarskóla voru 557 mkr. og einkarekinna grunnskóla um 104 mkr. Byggingarstyrkir til einkarekinna grunnskóla bætast við þessar upphæðir, auk þess sem Ísaksskóli fékk á árinu 2003 55 mkr. styrk vegna til að takast á við uppsafnaðan rekstrarvanda. Leikskólaráð veitti 2 mkr. til almennra styrkja og sömu upphæð til þróunarverkefna. Auk þess voru framlög til einkarekinna leikskóla og niðurgreiðslur dagvistunar á einkaheimilum rúmar 421 mkr.

Styrkir félagsmála renna öðru fremur til reksturs og þjónustu af ýmsum toga. Á árinu 2003 voru styrkir til félagsmála rúmar 67 mkr. Félagsmálaráð ákveður styrki á sínu sviði og eru þeir háðir því að styrkþegar veiti þjónustu sem flokkast undir skylduverkefni Félagsþjónustunnar skv. lögum og því faglega mati að þjónustan sé í betur komin hjá styrkþega en hjá borginni sjálfri. Um slíka styrki eru gerðir skriflegir samningar. Þjónustusamningar eru stærsti hluti styrkja Félagsþjónustunnar/félagsmálaráðs eða 37 mkr. Þá voru húsnæðisstyrkir vegna félagsmála um 30 mkr.

Starfshópurinn telur mikilvægt að fagnefndir marki sér skýra stefnu um markmið sín með styrkveitingum og taki afstöðu til þess hvert hlutfall þjónustusamninga, starfssamninga, starfslauna eða einstakra almennra styrkja eigi að vera af heildarfjármunum hverrar nefndar til styrkja. Mikilvægt er að slík stefnumörkun verði gerð umsækjendum aðgengileg.

Auglýsingar og umsóknarfrestur

Umsóknarfrestur á undanförnum árum hefur verið frá miðjum október til 20. nóvember. Hér er lagt til að úthlutun styrkja fari fram einu sinni á ári, styrkir séu auglýstir fyrr á haustin eða eigi síðar en 1. september og úthlutun sé lokið fyrir áramót. Vegur hér þungt að koma þarf til móts við aðila sem reiða sig á fjárframlög til verkefna sem skipuleggja þarf með góðum fyrirvara.

Nefndin telur að auglýsa eigi eftir styrkumsóknum með einni auglýsingu og á svipuðum nótum og verið hefur. Þá telur hópurinn til bóta sé að tekið sé á móti umsóknum á einum stað þannig að umsækjendum sé ekki ætlað að þekkja verkaskiptingu nefnda og ráða borgarinnar.

Samþykkt í borgarráði 9. september 2004