Könnunaraðferðin og íslenska

Könnunaraðferðin felst í því að börnin gera nákvæma athugun eða rannsókn á einhverju fyrirbæri sem er þess virði að vita eitthvað meira um. Það er yfirleitt lítill hópur af börnum á deildinni, stundum öll deildin, og í einstaka tilfellum eitt barn sem tekur að sér að gera könnunina. Stundum er það kennarinn sem ákveður viðfangsefnið, stundum börnin sjálf en það er alltaf gengið út frá því að áhugi barnanna á viðfangsefninu sé drifkrafturinn í verkefninu. Könnunaraðferðin getur verið mjög gagnleg börnum sem eru að læra annað mál og getur nýst kennurum til þess að átta sig á þekkingu barna í íslensku um þá hluti sem verið er að ræða. Þannig geta kennarar metið íslenskukunnáttu og áttað sig á því hvaða ný orð þarf að kenna. Eins er með könnunaraðferðinni verið að vinna verkefni sem hafa raunverulegan tilgang fyrir börnin og byggjast á áhuga þeirra sjálfra og í sífellu eru börnin að læra með því að framkvæma sjálf. Með því að nýta könnunaraðferðina til þess að læra um börnin, fjölskyldur þeirra og nánasta umhverfi læra börnin orð á íslensku yfir það sem raunverulega skiptir máli í þerra tilveru.  Sjá meira um könnunaraðferðina.

Notið útskýringar, t.d. í vettvangsferðum. Notið raunverulega hluti til þess að útskýra betur hvað var átt við en þannig geta börnin betur skilið hvað var verið að gera og segja. 

Kennið börnunum að spyrja spurninga en það er mikilvægur liður í kennslu annars máls.

Eflið orðaforða barnanna með því að kenna þeim markvisst ný orð, einnig flókin orð eftir því sem hæfni þeirra eykst. Hægt er að leggja inn tvö til þrjú ný orð á viku, útskýra þau vel og nýta þau síðan í starfinu með börnunum. Dæmi um það getur verið  orðið hughraust/ur. Orðið er lagt inn og útskýrt, foreldrar fá að vita hvaða orð er verið að vinna með og starfsfólk leggur sig fram um að nota nýju orðin á fjölbreyttan hátt t.d. Mikið varstu hughraust þegar þú hoppaðir niður af sandkassanum eða mikið varstu hughraustur að láta kennarann vita að þú helltir niður!

Útbúið gott horn fyrir fjölbreyttan hlutverkaleik t.d. spítala, skrifstofu, búið, heimili o.s.frv. en á þann hátt læra börnin orð um hluti sem tengjast þessum viðfangsefnum í gegnum leikinn.

Ræðið hvað það er sem börnin vita fyrir um ákveðið málefni og bætið við þá þekkingu með nýjum orðum. Þetta er sérstaklega mikilvægt fyrir börn með lítinn íslenskan orðaforða.

Endurtakið orð, setningar, setningahluta og frasa. Það liggur í hlutarins eðli að þegar verið er að vinna með könnunarverkefni er sífellt verið að vinna með endurtekningu. Börnum gefst tími til að endurtaka orð, frasa og setningar um málefni sem þau eru að kynnast þangað til þau öðlast betri skilning. Með því að nota vísur, þulur og bækur ýtum við jafnframt undir þessar endurtekningar.

Útfærið spurningar til barnanna út frá ólíkri getu þeirra í íslensku. Sum börn geta spurt og svarað já og nei spurningum á meðan önnur börn geta spurt og svarað flóknari spurningum. Smátt og smátt geta kennarar eflt þessa færni hjá börnunum.