19.12.2011

Borgarstjórnarfundur 15. nóvember 2011

B O R G A R S T J Ó R N

Ár 2011, þriðjudaginn 15. nóvember, var haldinn fundur í Borgarstjórn Reykjavíkur.  Fundurinn var haldinn í Ráðhúsi Reykjavíkur og hófst kl. 14.00. Voru þá komnir til fundar, auk borgarstjóra, eftirtaldir borgarfulltrúar og varaborgarfulltrúar: Elsa Hrafnhildur Yeoman, Karl Sigurðsson, Margrét Kristín Blöndal, Eva Einarsdóttir, Páll Hjalti Hjaltason, Oddný Sturludóttir, Dagur B. Eggertsson, Björk Vilhelmsdóttir, Gísli Marteinn Baldursson, Geir Sveinsson, Júlíus Vífill Ingvarsson og Sóley Tómasdóttir.
Fundarritari var Helga Björk Laxdal.

Þetta gerðist:

1. Fjárhagsáætlun 2012; fyrri umræða.
 Lagt fram frumvarp að fjárhagsáætlun Reykjavíkurborgar fyrir árið 2012 ásamt greinargerð og starfsáætlunum, sbr. 7. lið fundargerðar borgarráðs frá 12. nóvember. Jafnframt lagðar fram tillögur borgarstjóra undir eftirtöldum liðum í fundargerð borgarráðs frá 12. nóvember: 2. liður, álagningarhlutfall fasteignaskatta og lóðaleigu, 3. liður, viðmiðunartekjur til lækkunar fasteignaskatts elli- og örorkulífeyrisþega, 4. liður, álagningarhlutfall útsvars og 6. liður, breytingar á gjaldskrám.

- Klukkan 14.05 tekur Hanna Birna Kristjánsdóttir sæti á fundinum.
- Klukkan 14.08 tekur Kjartan Magnússon sæti á fundinum.

 Tillaga borgarstjóra um álagningarhlutfall fasteignaskatta og lóðaleigu, sbr. 2. lið fundargerðar borgarráðs frá 12. nóvember, var borinn upp til atkvæðagreiðslu í fimm liðum;
 Liður 1, hlutfall fasteignaskatts vegna íbúðarhúsnæðis skv. a-lið 3. mgr. 3. gr. laga um tekjustofna sveitarfélaga nr. 4/1995 m.s.br. verði 0,2 %, samþykktur með 14 samhljóða atkvæðum.
 Liður 2, hlutfall fasteignaskatts vegna opinberra bygginga skv. b-lið 3. mgr. 3. gr. laga um tekjustofna sveitarfélaga nr. 4/1995 m.s.br. verði 1,32 %, samþykktur með 9 samhljóða atkvæðum.
 Liður 3, hlutfall fasteignaskatts vegna atvinnuhúsnæðis skv. c-lið 3. mgr. 3. gr. laga um tekjustofna sveitarfélaga nr. 4/1995 m.s.br. verði 1,32%, að viðbættu 25% álagi, sbr. heimild í 4. mgr. sömu greinar verði (1,65%), samþykktur með 9 samhljóða atkvæðum.
 Liður 4, hlutfall lóðarleigu fyrir íbúðarhúsalóðir verði 0,2% af fasteignamatsverði, samþykktur með 9 atkvæðum gegn 5.
 Liður 5, hlutfall leigu fyrir atvinnuhúsalóðir og lóðir fyrir opinberar byggingar, verði 1,0% af fasteignamatsverði, samþykktur með 9 samhljóða atkvæðum.
 Tillaga borgarstjóra um viðmiðunartekjur til lækkunar fasteignaskatts elli- og örorkulífeyrisþega, sbr. 3. lið fundargerðar borgarráðs frá 12. nóvember, samþykkt með 14 samhljóða atkvæðum.
 Tillaga borgarstjóra um álagningarhlutfall úsvars, sbr. 4. lið fundargerðar borgarráðs frá 12. nóvember, samþykkt með 10 atkvæðum gegn 5.
 Tillaga borgarstjóra um breytingar á gjaldskrám, sbr. 6. lið fundargerðar borgarráðs frá 12. nóvember, samþykkt með 9 samhljóða atkvæðum.
 Samþykkt með 15 samhljóða atkvæðum að vísa frumvarpi að fjárhagsáætlun fyrir árið 2012, ásamt greinargerð og starfsáætlunum, til síðari umræðu.

 Borgarfulltrúar Sjálfstæðisflokksins óska bókað:
 
Frumvarp að fjárhagsáætlun Reykjavikurborgar 2012 er enn eitt dæmið um það hvernig kerfið þenst út á kostnað fólksins sem ekki er aflögufært. Það kemur ekki á óvart að þar skorti alla pólitíska sýn, stefnu og forgangsröðun fyrir Reykjavík. Meirihluti Samfylkingar og Besta flokks virðist ekki hafa neina aðra forgangsröðun en þá að verja kerfið á kostnað borgarbúa. Meirihlutinn heldur því fram að þannig hafi náðst mikill afgangur í rekstri borgarinnar, en nefnir ekki að sá afgangur er tilkominn vegna of hárra skatta og gjalda á almenning. Ekki er sýnt fram á raunverulega hagræðingu í miðlægri stjórnsýslu. Umfang kerfisins minnkar ekki, launakostnaður eykst umfram samningsbundar launahækkanir og starfsfólki í ráðhúsinu fjölgar svo fátt eitt sé nefnt sem betur hefði mátt vinna til að hlífa borgarbúum við frekari álögum. Meirihlutinn ætlar að fá 500 milljónir vegna gjaldskrárhækkana frá borgarbúum á árinu 2012. Þetta er gert þrátt fyrir að skatttekjur aukist um 4,2 milljarða á milli ára. Frá árinu 2010 hafa skatttekjur borgarinnar aukist um 15% og samt sér ekki fyrir endann á  gjaldskrárhækkunum og skattheimtu hjá meirihlutanum. Fulltrúar Sjálfstæðisflokksins bentu á það fyrir ári að skattahækkanir sem áttu að taka 800 milljónir úr vösum borgarbúa, væru óþarfar. Í ljós kom að skatttekjur borgarinnar voru 1,6 milljarður króna umfram áætlun sem staðfesti að ekki þurfti að grípa til skattahækkanna. Það virðist ekkert lát vera á hversu mikið meirihlutinn vill ráðskast með ráðstöfunarfé borgarbúa og belgja með því út stjórnsýslu borgarinnar. Heildargjaldskrárhækkanir á barnafjölskyldur í borginni má áætla að séu um 35% síðan 2010 og þá er útsvarshækkun ekki meðtalin. Rekstarútgjöld A-hluta hækka um 3,4 milljarða frá árinu 2011, launahækkanir eru þar 1,4 milljarður en afgangurinn er annar rekstrarkostnaður. Spyrja má hvort það sé nauðsynlegt að auka annan rekstrarkostnað um 2 milljarða og hvort þau verkefni sem þar búa að baki séu nauðsynleg. Borgarbúar hafa að minnsta kosti ekki fengið að velja eða forgangsraða verkefnum en fá þess í stað sendan reikninginn. Á sama tíma og þetta gerist er meirihlutinn að setja á stofn nýja deild í Ráðhúsi Reykjavíkur sem á að halda utan um samskipti við fjölmiðla og eykst miðlægur kostnaður vegna þessa. Starfsmönnum hefur fjölgað úr 229 í 240 í Ráðhúsinu á einu og sama árinu og meirihlutinn ætlaði að skera niður um 300 milljónir í miðlægri stjórnsýslu. Þá er ekki hægt að sjá að meint hagræðing í skólakerfinu, sem setti allt skólasamfélagið í uppnám fyrr á árinu, sé að skila nokkrum árangri. Ný lántaka vegna framkvæmda á árinu 2012 er áætluð 6,2 milljarðar. Það hefði verið ábyrgara að fresta einhverjum af þeim fjárfestingaverkefnum sem lagt er í og forgangsraða frekar í þágu barna og fjölskyldna í borginni. Skuldir aukast um 6,8% á árinu 2012 og hafa aukist þá um 51% frá árinu 2010. Það er ljóst að ef borgarbúar hefðu haft eitthvað um forgangsröðun í fjárhagsáætluna að segja hefðu þeir líklega ekki ákveðið að hækka enn álögur á fólkið til þess að belgja enn frekar út kerfið og gera meirihlutanum kleift að vinna að sínum gæluverkefnum á meðan þjónusta er skert við borgarbúa.

2. Lögð fram svohljóðandi tillaga borgarfulltrúa Sjálfstæðisflokks.

Borgarstjórn Reykjavíkur þakkar af heilum hug fyrir framlag þeirra tugþúsunda Reykvíkinga sem sinna fórnfúsu og óeigingjörnu sjálfboðaliðastarfi í þágu íbúa Reykjavíkur. Ljóst er að slíkt sjálfboðaliðastarf er drifkraftur í starfsemi fjölmargra félaga og samtaka sem bæta mannlíf í borginni með ýmsum hætti, t.d. með íþróttaiðkun, æskulýðsstarfi, foreldrastarfi í skólum, starfi í þágu eldri borgara, umhverfisstarfi, kristilegu starfi, mannúðarmálum og svo framvegis. Borgarstjórn lýsir yfir stuðningi við meginmarkmið Evrópuárs sjálfboðaliðastarfs 2011 og samþykkir jafnframt að halda alþjóðlegan dag sjálfboðaliðans, 5. desember, hátíðlegan ár hvert með því að efna þann dag til kynnisheimsókna borgarfulltrúa til frjálsra félaga og samtaka í borginni sem sinna sjálfboðaliðastarfi.
Greinargerð fylgir tillögunni.
Borgarfulltrúar Besta flokksins og Samfylkingar leggja til að tillögunni verði vísað til borgarráðs.
Samþykkt með 15 atkvæðum að vísa tillögunni til borgarráðs.
3. Kosning varamanns í hverfisráð Háaleitis og Bústaða.
Samþykkt með 15 samhljóða atkvæðum að Helgi Þórsson taki sæti varamanns í hverfisráði Háaleitis og Bústaða í stað Sigurþórs Sigurjónssonar.
- Klukkan 16.20 víkur Hanna Birna Kristjánsdóttir af fundi og Marta Guðjónsdóttir tekur þar sæti.
4. Fram fór umræða um leikskólamál.
5. Lögð fram fundargerð borgarráðs frá 3. nóvember, 1. liður á dagskrá, tillaga um eigendalán til Portusar er samþykktur með 10 atkvæðum gegn 1. 17. liður, þar sem lagt er til að Margrét Kristín Blöndal taki sæti í hverfisráði Kjalarness í stað Ágústs Más Garðarssonar, samþykktur með 15 samhljóða atkvæðum. Lögð fram fundargerð borgarráðs frá 10. nóvember, 16. liður, 300 ára afmæli Skúla Magnússonar samþykktur með 14 samhljóða atkvæðum. Lagðar fram fundargerðir borgarráðs frá 11. nóvember og 12. nóvember.
6. Lagðar fram fundargerðir forsætisnefndar frá 11. nóvember, íþrótta- og tómstundaráðs frá 4. nóvember, mannréttindaráðs frá 8. nóvember, skipulagsráðs frá 9. nóvember, skóla- og frístundaráðs frá 2. nóvember, umhverfis- og samgönguráðs frá 25. október og 8. nóvember og velferðarráðs frá 27. október og 3. nóvember.

Fundi slitið kl. 18.55.

Forseti og skrifarar gengu frá fundargerð.

Elsa Hrafnhildur Yeoman

Karl Sigurðsson                Geir Sveinsson