Músíktilraunafréttir

Shogun, sigurbandið frá því í fyrra, mun opna dagskrána en keppnin verður send út í beinni útsendingu á Rás 2.

Veitt verða verðlaun fyrir besta hljómborðsleikarann/forritarann, besta trommarann, besta bassaleikarann, besta gítarleikarann, besta söngvarann/rapparann og veitt verður viðurkenning fyrir besta íslenska textann. Hljómsveit fólksins verður valin í símakosningu og að sjálfsögðu verða veitt verðlaun fyrir 1., 2. og 3. sætið.

Forsala miða hefst í Hinu húsinu á hádegi og flyst í Listasafn Reykjavíkur þegar húsið opnar kl. 16:00.

Fimmta og síðasta undankvöldi Músíktilrauna fór fram í Austurbæ í kvöld. Troðfullur salur kaus hljómsveitina Agent Fresco áfram í úrslit en dómnefndin ákvað að senda Johnny computer áfram til þess að keppa við átta aðrar hljómsveitir á úrslitakvöldi Músíktilrauna.

Úrslitakvöld Músíktilrauna fer fram í Listasafni Reykjavíkur, Hafnarhúsinu, laugardaginn 15. mars kl. 17:00. Miðasala hefst í Hinu húsinu kl. 12:00, húsið opnar kl. 16:00 og þá flyst miðasalan í Listasafnið. Keppnin hefst stundvíslega kl. 17:00 og verður send út í beinni útsendingu á Rás 2.

Fjórða og næstsíðasta undankvöld Músíktilrauna fór fram í Austurbæ fimmtudagskvöldið 13. mars. Flest atkvæði áhorfenda hlaut hljómsveitin Blæti en dómnefndin ákvað að senda hljómsveitina Happy funeral áfram í úrslit.

Fimmta og síðasta undankvöldið fer fram í Austurbæ á föstudagskvöldið. Miðasala hefst í Austurbæ kl. 13:00, húsið opnar kl. 18:00 og keppnin hefst stundvíslega kl. 19:00.

Nú er það ljóst að hljómsveitirnar The Nellies frá Mosfellsbæ og Ástarkári frá Hafnarfirði eru komnar áfram í úrslit. Þriðja undankvöld Músíktilrauna fór fram í Austurbæ í kvöld.

The Nellies og Ástarkári hafa því bæst í hóp hinna sem taka þátt í úrslitum Músíktilrauna í Listasafni Reykjavíkur, Hafnarhúsi á laugardaginn.

Í kvöld voru það hljómsveitirnar Endless dark og Furry strangers sem komust áfram í úrslit þegar keppni á öðru undankvöldi Músíktilrauna 2008 fór fram í Austurbæ.

Eftir spennandi keppni fór hljómsveitin Endless dark áfram á atkvæðum áhorfenda í sal en dómnefndin ákvað að senda Furry strangers í úrslit.

Því má bæta við að Gulli (Gunnlaugur Arnar Sigurðsson) er "opinber" ljósmyndari Músíktilrauna 2008. Daglega setjum við inn myndir sem Gulli tekur á undankvöldunum hingað á heimasíðuna og þær eru einnig til sýnis á risaskjám í anddyri Austurbæjar.

10 hljómsveitir spreyttu sig en hljómsveitirnar Hinir og Óskar Axel og Karen Páls tryggðu sér sæti á úrslitakvöldinu. Hljómsveitin Hinir komst áfram á atkvæðum áhorfenda í sal. Dómnefndin hafði reyndar sjálf ákveðið að senda þá hljómsveit áfram en þurfti að breyta á síðustu stundu og valdi Óskar Axel og Kareni Páls til áframhaldandi þátttöku.

Hinir og Óskar Axel og Karen Páls keppa því við átta önnur bönd á úrslitakvöldinu sem fer fram í Listarsafni Reykjavíkur, Hafnarhúsi laugardaginn 15. mars.

Næsta undankvöld Músíktilrauna verður á þriðjudagskvöldið í Austurbæ. Miðasala hefst kl. 13:00, húsið opnar klukkan 18:00 og fyrsta hljómsveitin stígur svo á stokk klukkan 19:00. Áhorfendur senda síðan eina hljómsveit í úrslit en dómnefnd velur hina. Það er því um að gera að mæta og styðja sína hljómsveit til sigurs og reynsla dagsins í dag segir okkur að það er um að gera að mæta tímanlega og tryggja sér miða.

Hljómsveit má ekki hafa gefið út efni sitt á geisladisk, plötu eða hljóðsnældu. Talað er um útgáfu þegar efni er selt og markaðsett skipulega fyrir almenning. Ekki er um útgáfu að ræða þegar efni er eingöngu notað sem gjafir, þrátt fyrir að það sé á geisladisk, plötu eða hljóðsnældu, eða eftir að hljómsveit hefur eingöngu komið út á safnplötu. Sökum þess hversu auðvelt er að útbúa og dreifa tónlist í gegnum netið telst það ekki til útgáfu og er því leyfilegt.

Á þessum forsendum hefur hljómsveitinni DJ Flugvélar og Geimskip verið vísað frá keppni þar sem hún hefur gefið út efni hjá Melar Records og selt og dreift efni í 12 Tónum. Þetta er gert í fullri sátt og samkomulagi við hljómsveitarmeðlim sem einfaldlega gerði sér ekki grein fyrir reglum Músiktilrauna.

Í gegnum tíðina hafa Músíktilraunir átt gott samstarf við Rás 2. Ítarleg umfjöllun fer fram á Rás 2 frá því skráning hefst og þartil keppni lýkur. Það ætti því ekki að fara framhjá landsmönnum að Músíktilraunir standa yfir.

Kynnar á Músíktilraunum hafa alltaf verið dagskrárgerðarmenn Rásar tvö. Fyrst var það Snorri Sturluson sem gegndi því hlutverki en síðustu árin hefur það verið hlutverk Ólafs Páls Gunnarssonar að kynna unga og efnilega tónlistarmenn á svið.

Í ár hefur þátturinn Lög unga fólksins verið með ítarlega umfjöllun um keppnina og hafa þeir leikið efni frá Músíktilraunum fyrri ára auk þess að gefa hljómsveitunum sem keppa í ár góðan gaum.

Rás 2 kemur til með að senda út beint frá úrslitakvöldinu í Listasafni Reykjavíkur, laugardaginn 15. mars kl. 17:00 - 22:00. Áheyrendur geta tekið þátt í símakosningu og valið Hljómsveit fólksins með því að hringja í rétt númer eða senda SMS.