Klaustursaga
Viðey byggðist skömmu eftir landnám en lítið er til af rituðum heimildum um eyjuna fyrstu aldirnar. Árið 1225 stofnaði Þorvaldur Gissurarson klaustur í Viðey með aðstoð Snorra Sturlusonar. Var þetta fyrsta klaustrið í Sunnlendingafjórðungi og óx það að efnum. Það varð næstríkasta klaustur landsins og átti 116 jarðir þegar mest var.
Klaustrið leið undir lok með sögulegum hætti þegar menn Danakonungs rændu það árið 1539 í aðdraganda siðaskiptanna. Næstu 200 árin var Viðey hjáleiga frá Bessastöðum og var þar meðal annars þurfamannahæli.