Útivistarrjóðrin í Grafarholti vígð
29.10.2009
Upplestur á frétt 
Þrátt fyrir að veðurguðirnir hafi ekki verið samvinnuþýðir í þetta sinn létu íbúar Grafarholts og Úlfarsárdals sig
ekki vanta við vígslu fyrstu rjóðranna. Komið var saman í rjóðrinu austan Sæmundarskóla við bakka Reynisvatns þar
sem rjóðrin voru formlega opnuð íbúum. Dagskráin var óformleg og hófst með því að skólabörn úr Sæmundarskóla tóku
lagið. Guðmundur Hrafn Arngrímsson verkefnastóri sagði frá vinnunni og aðkomu ungmenna frá sjálfboðaliðasamtökunum
SEEDs , unglingum úr báðum grunnskólum hverfisins og foreldrum.
Gísli Marteinn Baldursson vatt sér uppá borð og talaði um mikilvægi frumkvæðis frá íbúum og kraftinn sem leystur er
úr læðingi þegar íbúar og borgarstofnanir vinna saman að verkefnum nærumhverfinu. Að lokum var viðstöddum boðið í
göngu með Höskuldi Jónssyni hinum kunna útivistar manni um svæðið.
Verkefnið Útivist og hreyfing er styrk af Forvarnar og framfarasjóði Reykjavíkurborgar. Verkefnið hefur það að
markmiði að skipuleggja fjögur rjóður sem verða áningarstaðir á fallegri gönguleið um nágrenni Reynisvatns og eru
viðleitni til þess að mæta þörfum íbúa fyrir útivist og hreyfingu. Nú eru tvö rjóður tilbúin til notkunar en vonast
er til að verkefnið klárist næsta sumar.