Berglind Björnsdóttir ljósmyndari hlýtur styrk úr minningarsjóði Magnúsar Ólafssonar
01.07.2010
Upplestur á frétt 
Berglind Björnsdóttir ljósmyndari hlaut á dögunum styrk úr Minningarsjóði Magnúsar Ólafssonar (1862-1937). Mjög margar frambærilegar umsóknir bárust og var valið af þeim sökum afar erfitt. Fjöldi umsókna var vonum framar; umsækjendur 70 talsins og margir með fleiri en eina umsókn. Í úthlutunarnefndinni voru Leifur Þorsteinsson ljósmyndari fyrir hönd fjölskyldunnar, Lárus Karl Ingason formaður Ljósmyndarafélags Íslands og María Karen Sigurðardóttir safnstjóri Ljósmyndasafns Reykjavíkur og formaður sjóðsstjórnar.
Tilgangur Minningarsjóðs Magnúsar Ólafssonar er að styrkja ljósmyndun á Íslandi sem listgrein. Hann er eini sjóður sinnar tegundar hér á landi, einungis ætlaður þeim sem vinna að ljósmyndun á Íslandi eins og kemur fram í skipulagsskrá sjóðsins. En það voru erfingjar Magnúsar sem stofnuði sjóðinn og afhentu hann Ljósmyndasafni Reykjavíkur árið 2000.
Þetta er í fyrsta sinn sem úthlutað er úr sjóðnum og er styrkurinn 700 þúsund krónur. Ráðgert er að veita styrk úr sjóðnum þriðja hvert ár.
Berglind Björnsdóttir er menntuð sem ljósmyndari í Bandaríkjunum, var bæði í Florida og Arizona ásamt því að vera nýútskrifuð frá Háskóla Íslands úr Hagnýtri Menningarmiðlun. Hún hefur hlotið fjölda verðlauna og viðurkenninga hérlendis og erlendis, auk þess að hafa tekið þátt í á 3 tug sýninga, ýmist einkasýningar eða samsýningar.
Verkefnið sem ber heitið Kona á að fjalla um konur á öllum aldri, drauma þeirra og þrár.
Menningar- og ferðamálaráð Reykjavíkur veitti Minningarsjóði Magnúsar Ólafssonar 500 þúsund króna framlag vegna fyrstu úthlutunar úr sjóðnum.