Öskudagsráðstefna 2011 – skráning hafin
10.02.2011
Upplestur á frétt 
„Lærir hver af öðrum“ er yfirskrift öskudagsráðstefnunnar í ár. Aðalfyrirlesarinn að þessu sinni Dr. Neil Hawkes sem segja mun frá hugmyndafræði, meginmarkmiðum og skipulagi Lífsmenntar (Value-Based-Education). Fimm málstofur verða í boði þar sem farið verður í samþætta útkennslu, rathlaup, endurnýtingu í list- og verkgreinum og þematengda listgreinakennslu, íslenskukennslu fyrir alla, náttúrufræðikennslu á mið- og unglingastigi og kennarann í skóla margbreytileikans. Skráning er hafin á ráðstefnuna.
Ráðstefnan verður haldin miðvikudaginn 9. mars á Hilton Reykjavík Nordica hótelinu, Suðurlandsbraut 2 og hefst kl. 13:00.
Hér fyrir neðan eru nánari upplýsingar um dagskrá, aðalfyrirlestur og efni málstofanna. Vinsamlegast kynnið ykkur áður en þið farið inn á skráningarvef þar sem velja þarf málstofu.
DAGSKRÁ
Kl. 13:00 Setning ráðstefnu, kór Vogaskóla syngur undir stjórn Ágústu Jónsdóttur. Ávarp Ragnars Þorsteinssonar fræðslustjóra
Kl. 13:30 Málstofur, þátttakendur velja sér eina málstofu af fimm við skráningu, sjá nánar hér fyrir neðan.
Kl. 14:50 Kaffiveitingar
kl. 15:15 Aðalfyrirlestur, sjá nánar hér fyrir neðan
Kl. 16:15 Ráðstefnuslit, Oddný Sturludóttir formaður menntaráðs Reykjavíkur
Sækja auglýsingu PDF
Skráningu á Öskudagsráðstefnu er lokið
AÐALFYRIRLESTUR
Að kenna nemendum að tileinka sér góð gildi
Dr. Neil Hawkes, D.Phil (Oxford), MEd, BA, Cert.Ed, ACP, FCollP, FRSA, National Education Trust’s (NET) Leading Thinker. Þetta er einstakt tækifæri til að hlusta á Dr. Neil Hawkes segja frá hugmyndafræði, meginmarkmiðum og skipulagi Lífsmenntar. Hann segir: “Lífsmennt er byggð á því að læra til skilnings og leita merkingar og tilgangs í námsferlinu. Slíkt nám viðurkennir jafngildi og heiðarleika allra þeirra sem lifa og starfa innan skólans til að skapa lærdómssamfélag sem þróar jákvæð samskipti og gæði í menntun.”
Margir skólar víðs vegar um heiminn eru að vinna með þessa hugmyndafræði með góðum árangri. Neil mun kynna sjö meginþætti sem skipta máli við þróun slíks skólastarfs sem eru:
1.að skilja að lífsmennt er lykill að því að byggja upp námsanda sem eflir gæði náms og kennslu
2.að meta og bera umhyggju fyrir öllum nemendum og starfsmönnum
3.samþykkt að allt starf innan skólans byggist á jákvæðum mannlegum gildum
4.að móta jákvæð mannleg gildi s.s. virðingu og heiðarleika
5.gefa tíma og rúm fyrir kyrrð og ígrundun
6.þróa menningu og umhverfi sem endurspeglar gildi skólans
7.vinna með og innan skólasamfélagsins.
Dr Neil Hawkes, hefur starfað sem kennari, skólastjórnandi og ráðgjafi í menntamálum.Neil var skólastjóri West Kidlington School sem hefur hlotið viðurkenningar bæði innanlands sem utan fyrir frábært starf á þessu sviði og ritaðar hafa verið bækur um það starf sem nefnast Hljóða byltingin I og II (A Quiet Revolution) eftir Frances Farrer. Síðastliðna áratugi hefur Neil starfað við að móta og þróa nám og kennslu Lífsmenntar (Value-Based-Education).Hann er alþjóðlegur ráðgjafi sem starfar fyrir UNICEF við að leggja undirstöður að námsefni Lífsmenntar (Living Values Programme) og er vel þekktur sem hrífandi ræðumaður. Hann hlaut Doktornafnbót sína frá Oxford háskóla fyrir rannsókn sína á Lífsmennt (Value Education).
Síðastliðin ár hefur Neil unnið í Ástralíu, Belgíu, Borneo, Frakklandi, Grikklandi, Hollandi, Jamaica, Líbanon, Sviss, Seychells, og Stóra Bretlandi. Frekari upplýsingar er að finna á heimasíðu Dr. Neil Hawkes
www.values-education.com
FIMM MÁLSTOFUR (vinsamlegast veljið eina við skráningu á ráðstefnuna)
1. SAMÞÆTT ÚTIKENNSLA
Rathlaup sem skólaíþrótt og þjálfun í margþættri lífsleikni
Guðmundur Finnbogason, heimilisfræðikennari í Laugarnesskóla og Per Arne Troset, rathlaupari og þjálfari og Elise Egseth, rathlaupari frá Noregi.
Rathlaup (Orienteering) hefur ekki verið stundað á Íslandi fyrr en árið 2009. Það hefur þó verið stundað í Skandinavíu síðan um 1890 og keppnir haldnar reglulega frá 1897. Rathlaup er nú ein af svo kölluðum skólaíþróttum í Noregi og Svíþjóð ásamt sundi og dansi. En skólaíþróttir eru einu íþróttirnar sem að skylda er að kenna í þessum löndum.
Nú gefst kennurum í Reykjavík tækifæri til að kynna sér Rathlaup eða Orienteering. Íþróttin sameinar rötun og víðavangshlaup. Þannig er hlaupið á milli fyrirfram ákveðinna stöðva með hjálp korts. Hver þátttakandi fær kort sem merktar eru inn á ákveðnar stöðvar. Þátttakendur þurfa svo að fara á milli stöðvanna í réttri röð á sem stystum tíma. Íþróttin hentar sérstaklega vel í skólastarfi þar sem að ekki þarf að kosta til miklum búnaði og hægt er að sníða hana að þörfum mismunandi aldurs og getuhópa. Íþróttin er talin hafa marga kosti sem skólaíþrótt þar sem hún þjálfar lífsleiknifærni s.s. ratvísi, sjálfsöryggi, getuna til að taka ákvarðanir undir álagi og margt fleira. Þar að auki er íþróttin ódýr og góð leið til að njóta náttúrunnar án mikillar umgjarðar eða dýrs búnaðar. Umsjónarmenn málstofunnar eru Guðmundur Finnbogason, kennari við Laugarnesskóla og formaður Rathlaupsfélagsins Heklu, Per Arne Troset, rathlaupari og þjálfari frá Noregi og Elise Egseth, rathlaupari og keppandi í heimsmeistaramótaröð alþjóða rathlaupssambandsins (IOF). Per Arne og Elise koma bæði sérstaklega til að leiðbeina á Öskudagsráðtefnunni.
Þátttakendur munu fá kynningu á íþróttinni og möguleikum hennar fyrir skólastarf auk þess að fræðast um verkefnið „Rathlaup sem skólaíþrótt“ sem unnið er á vegum þriggja skóla í Reykjavík. Þátttakendur þurfa að koma búnir til útiveru á málstofuna en hún fer fram í Laugardalnum. Boðið verður upp á framhaldsnámskeið fyrir þá sem hafa áhuga fimmtudag og föstudag eftir ráðstefnuna.
2. ENDURNÝTING Í LIST- OG VERKGREINUM OG ÞEMATENGD LISTGREINAKENNSLA
Þematengd listgreinakennsla
Guðrúnu Gísladóttur, Sigurlaugu Jóhannsdóttur og Vilhelmínu Thorarensen kennarar í Sæmundarskóla
Hugmyndafræði og útfærsla þematengdrar listgreinakennslu þar sem kennarar útfæra verkefni þemans á ólíkan hátt. Nálgunin getur verið þrívíð, tvívíð eða unnin í tölvu í þeim tilgangi að nemendur fái tækifæri til fjölbreyttari vinnuaðferða og framsetningar.
Listsköpun úr endurnýtanlegu efni
Linda S. Birgisdóttir, myndmenntakennariog Hildur Gylfadóttir, smíðakennari í Hamraskóla
Í Hamraskóla hefur í nokkur ár verið reynt að nýta í listsköpun ýmislegt efni sem til fellur í skólanum og á heimilum. Í erindinu verður sagt frá endurnýtingarverkefnum sem unnin hafa verið með nemendum undanfarin 3-4 ár og myndir sýndar. Áherslan er á að skapa úr verðlausum efnum. Í tveimur verkefnanna er aðaláherslan á ferlið og uppgötvunina í efnisskoðuninni og leiknum með efnið, en í hinum verkefnunum er ætlast til að vinnunni ljúki með ákveðinni afurð.
3. ÍSLENSKUKENNSLA FYRIR ALLA
Íslenska í öllum námsgreinum
Valgerður Eiríksdóttir , Fríða Torfadóttir, Sveinbjörg Sveinbjarnardóttir og Þóra Hrönn Óðinsdóttir kennarar í Fellaskóla
Teymi kennara í Fellaskóla fjallar um kennslu í skóla þar sem tæplega 50% nemenda eru samtímis að læra íslensku og læra á íslensku.
Samvinna í læsi og ritun
Anna Steinunn Valdimarsdóttir, Anna Guðný Guðjónsdóttir, Fríða S. Haraldsdóttir, Margrét Sólmundsdóttir kennarar í Laugalækjarskóla
Í málstofunni kynna kennarar hvað gert er í Laugalækjarskóla varðandi læsi og ritun. Um er að ræða samvinnu upplýsingavers og kennara í íslensku, samfélagsfræði, tungumálum og náttúrufræði. Farið verður yfir bókmenntakennslu í 7. -10. bekk og fjallað um lesflokka, lestrarhópa, valbækur, framkvæmd lestrarátaks og verkefni þessu tengd. Einnig verða kynnt ritunarverkefni sem tengjast bókmenntum og lestri sem dæmi má nefna ritun eða skapandi skrif þar sem kveikjan er sótt samfélagsfræði- og náttúrufræðiverkefni.
4. NÁTTÚRUFRÆÐIKENNSLA Á MIÐ- OG UNGLINGASTIGI
Áherslur í rannsóknum á náttúrufræðimenntun
Allyson Macdonald, prófessor, Menntavísindasvið Háskóla Íslands
Rætt verður um nokkur dæmium rannsóknir er varða náttúrufræðimenntun hérlendis. Til dæmis er unniðað rannsóknum um gerð námsbóka og notkun þeirra, notkun á upplýsinga- og samskiptatækni, læsi og náttúrufræði, gerð og endurskoðun námskráa og trú kennara á getu skólans. Sagt verður stuttlega frá þróun í rannsóknum erlendis, sumt í framhaldi af PISA-niðurstöðum. Loks verða nefndar nokkrar áherslur sem eru farnir að hafa áhrif á hvað og hvernig er kennt en ekki síst hvað nemendur gera.
Hvernig geta nemendur orðið virkir í náttúrufræðinámi?
Ólafur Örn Pálmarsson náttúrufræðikennari við Laugalækjaskóla.
Fjallað verður um hvernig hægt er að virkja alla nemendur í náttúrufræðinámi með fjölbreyttum og ólíkum verkefnum á unglingastigi. Kynntar verða ólíkar kennslufræðilegar nálganir að viðfangsefnunum náttúrufræðinámsins með það að markmiði að glæða áhuga nemendanna og virkja þá til náms. Í þessum aðferðum er aðallega notast við hópavinnu og verklega kennslu. Viðfangsefni hópastarfsins eru mjög fjölbreytt en meðal verkefna eru bæklingagerð um kjarnorku, val um umfjöllunarefni úr Lifandi vísindum, lestextar af Vísindavefnum og dagblöðum, orðahlutaleikir en jafnframt verða kynnt góð einstaklingsmiðuð verkefni eins og gerð hugtakakort og sýnd dæmi um notkun þeirra. Fjallað verður um mikilvægi orðaforðakennslu í náttúrufræði og fjallað um orð sem reynast nemendum erfið. Í lokin verða tekin dæmi um einfaldar verklegar æfingar sem kennarar geta framkvæmt með nemendum sínum.
Gildi verklegrar vinnu í náttúrufræðinámi
María Sophusdóttir náttúrufræðikennari við Melaskóla.
Kynnt verða dæmi um viðfangsefni og rætt um skipulag og framkvæmd náttúrufræðikennslu á yngri barna stigi og miðstigi. Fjallað verður um hvernig verkleg vinna, s.s. einfaldar tilraunir, og umræður eru nýtt til að örva skilning nemenda á flóknum hugtökum og hjálpa þeim að yfirfæra námsreynslu sína á daglegt líf og umhverfi fyrir utan skólastofuna.
María Sophusdóttir er náttúrufræðikennari við Melaskóla undanfarin 3 skólaár. Var áður umsjónarkennari við sama skóla. Er meðhöfundur að bókinni Verklegar æfingar í náttúrufræði - 5.-7. bekkur -sem kom út hjá Námsgagnastofnun árið 2008.
5. KENNARINN Í SKÓLA MARGBREYTILEIKANS
Lýðræðissamfélagið skóli
Ólafur Páll Jónsson, dósent í heimspeki við Menntavísindasvið HÍ.
Í erindinu mun Ólafur Páll velta því fyrir sér hvort skóli sem sé lýðræðislegt samfélag sé eintómt ævintýri eða hvort hugsanlegt sé að einhversstaðar, kannski í fjarlægum heimi, sé til slíkur staður. Hann mun líka velta því fyrir sér, hvernig megi bera kennsl á slíkan stað ef maður skyldi rekast á hann. Ólafur Páll vinnur á sviði heimspeki menntunar einkum kenninga um lýðræði og réttlæti, heimspeki náttúrunnar, málspeki og heimspekilegrar rökfræði. Hann er höfundur bókarinnar Náttúra, vald og verðmæti (Hið íslenska bókmenntafélag, 2007) auk fjölda greina um ýmis efni. Hann hefur birt greinar í innlendum tímaritum, Hug, Ritinu og Skírni, og í erlendum tímaritum, m.a. Mind og Legal Theory.
Skóli margbreytileikans – námssamfélag og starfshættir
Hrund Logadóttir, verkefnastjóri á grunnskólaskrifstofu Menntasviðs Reykjavíkurborgar.
erindinu er því velt upp hvað átt er við þegar talað er um skóla margbreytileikans og hvaða kröfur gerðar eru til kennara og starfsfólks í slíkum skóla. Fjallað er um hvernig námssamfélag við sjáum fyrir okkur, hvernig við mótum við það og hvernig starfshætti við getum séð fyrir okkur í slíkum skóla.
Hrund Logadóttir er verkefnastjóri sérkennslu á grunnskólaskrifstofu Menntasviðs en starf verkefnastjóra sérkennslu felst m.a. í undirbúningi stefnumörkunar vegna nemenda með sérþarfir í almennum grunnskólum, sérskólum og sérdeildum. Hrund leggur einnig stund á doktorsnám við Menntavísindasvið Háskóla Íslands þar sem hún er að skoða sýn kennara sem aðhyllast skóla án aðgreiningar, hvernig sú sýn birtist í starfi með nemendum og upplifun nemenda af því að vera í slíkum skóla í þeim tilgangi að öðlast betri skilning á skóla án aðgreiningar og vonandi til að skilja betur hvernig hægt er að þróa slíka starfshætti á árangursríkan hátt í skólum almennt.
Fatlað fólk eða fatlað samfélag?
Embla Ágústsdóttir, nemi, vefstýra og fyrirlesari
Embla Ágústsdóttir er 20 ára framhaldsskólanemi og varaformaður stjórnar NPA miðstöðvarinnar, samvinnufélags um notendastýrða persónulega aðstoð. Embla hefur síðastliðinn þrjú ár haldið fyrirlestra bæði hérlendis og erlendis sem byggja á reynslu hennar verandi fötluð ung kona í nútíma samfélagi. Hún starfar einnig sem vefstýra Rannsóknarseturs í fötlunarfræðum við Háskóla Íslands.
Í erindinu fjallar Embla, út frá persónulegri reynslu sinni, um áhrif ríkjandi orðræðu á sjálfskilning fatlaðra barna og um þá miklu ábyrgð sem menntakerfið hefur á því að skapa samfélag fyrir alla.