Íslenskukennsla fyrir útlendinga kostar lítið miðað við ávinning
20.03.2007
Upplestur á frétt 
Greining sem gerð var á vegum menntaráðs Reykjavíkurborgar og Námsflokkanna leiðir í ljós að samfélagslegur ávinningur af markvissri íslenskukennslu fyrir fullorðið fólk af erlendu bergi brotnu er til muna meiri en útlagður kostnaður. 20 sérfræðingar, sem vinna að stefnumótun í málaflokknum og skipulagðri fræðslu, komast að þessari niðurstöðu. Hópurinn telur sýnt að auka þurfi ábyrgð atvinnurekenda á íslenskunámi erlendra starfsmanna og að ríkið og sveitarfélögin þurfi að byggja upp íslenskukennslu fyrir útlendinga. Aðrar niðurstöður hópsins voru:
- Brýnt er að gera þau verðmæti sýnileg sem fólgin eru í því fyrir íslenskt samfélag að fá hingað til lands fólk erlendis frá.
- Íslendingar leggja of mikla áherslu á að allir tali rétt mál og það gætir óþolinmæðis gagnvart útlendingum sem ekki tala íslensku.
- Íslenskunámið er oft ekki nógu hagnýtt og of mikil áhersla er lögð á málfræði.
- Stórauka þarf samstarf þeirra sem veita útlendingum fræðslu.
- Efla þarf námsefnisgerð.
- Auka þarf sýnileika innflytjenda, t.d. í fjölmiðlum og stjórnmálum.
- Bæta þarf aðgengi innflytjenda að íslenskum framhaldsskólum
Frekari upplýsingar veitir Björg Árnadóttir forstöðumaður Námsflokka Reykjavíkur