Skipulagstengdar spurningar

Spurning: Hvað er deiliskipulag?
Svar: Byggingaframkvæmdir eru bundnar í skipulagi, með því að ákveðin möguleg byggingaráform eru afmörkuð með deiliskipulagsuppdrætti, þ.e. hvað má gera á ákveðnu svæði. Deiliskipulagsuppdrættir eru samþykktir af borgaryfirvöldum og öðrum lögboðnum skipulagsyfirvöldum. Þeir eru einnig kynntir almenningi með auglýsingu þar sem almenning er gefinn kostur á að koma sínum athugasemdum á framfæri.


Spurning: Hvað er aðalskipulag?
Svar: Aðalskipulag er stefnumörkun sveitarstjórnar í þeim málaflokkum sem aðalskipulag skal ná til samkvæmt lögum og vera áætlun til minnst 12 ára. Málaflokkar eru landnotkun, samgöngu- og þjónustukerfi, umhverfismál og þróun byggðar í sveitarfélaginu. Aðalskipulag getur þó náð til fleiri málaflokka ef sveitarstjórn metur það svo. Aðalskipulag er háð staðfestingu umhverfisráðherra og tekur gildi þegar staðfesting þess hefur verið birt í B-deild Stjórnartíðinda. Aðalskipulag Reykjavíkur 2001 – 2024 nær til alls lands borgarinnar og er stefna borgarstjórnar um þróun borgarinnar á þeim tíma. Hvernig nýta á land og grunnkerfi borgarinnar á sem hagkvæmastan hátt, stuðla að öflugu atvinnulífi, gæðum byggðar og skilvirku og öruggu samgöngukerfi með sjálfbæra þróun að leiðarljósi. Stefna sett fram í aðalskipulaginu er í samræmi við svæðisskipulag höfuðborgarsvæðisins og er forsenda fyrir gerð deiliskipulags í Reykjavík. 


Spurning: Hvað er svæðisskipulag?
Svar: Svæðisskipulag er samræmd stefna tveggja eða fleiri sveitarfélaga um landnotkun, samgöngu- og þjónustukerfi, umhverfismál og þróun byggðar á því svæði sem það nær til, en getur náð til fleiri þátta ef viðkomandi sveitarfélög ákveða það. Svæðisskipulag skal gert til minnst 12 ára skv. lögum. Markmið þess eiga að taka mið af "efnahagslegum, félagslegum, menningarlegum þörfum, heilbrigði og öryggi og hagkvæmri og skynsamlegri nýtingu lands og landsgæða með sjálfbæra þróun að leiðarljósi" eins og segir í skipulagsreglugerð nr. 400/1998, sjá nánar hér. Svæðisskipulag höfuðborgarsvæðissins er m.a. hægt að nálgast hjá Framkvæmda- og eignasviði, Borgartúni 12-14, s: 411 1111.


Spurning: Deiliskipulag í ákveðnum hverfum?
Svar: Hringja í skiptiborð skiplags- og byggingarsviðs, sími 411 3000, sem gefur áfram á arkitekt hjá embætti skipulagsstjóra. Arkitektar eru fulltrúar skipulagsstjóra og sjá um skipulagningu á hverfunum. Einnig er gott að senda inn fyrirspurn í gegnum netið (skipbygg@rvk.is ) eða með bréfi (Skipulags- og byggingarsvið, Borgartúni 12-14, 105 Rvk.) þar sem málið er útskýrt.


Spurning: Er búið að samþykkja deiliskipulagið?
Svar: Hringja í skiptiborð skipulags- og byggingarsviðs, sími 411 1111 og biðja um skjalavörð eða ritara skipulagsstjóra.


Spurning: Hvað tekur langan tíma að breyta deiliskipulagi?
Svar: Minnst 2 mánuði ef allt gengur að óskum. Þegar uppdrættir eru komnir inn til skipulagsstjóra tekur skipulagsráð eða embætti skipulagsstjóra ákvörðun um að auglýsa erindið og vísar því svo í borgarráð sem samþykkir að það megi auglýsa málið. Að því loknu er auglýst í öllum blöðum og Lögbirtingablaðinu og er auglýsingatími (athugasemdarfrestur) 6 vikur. Að því loknu þarf, ef athugasemdir berast, að fara yfir þær, tekur mislangan tíma eftir umfangi athugasemda, og þá fer málið yfirleitt aftur til skipulagsráðs. Síðan er erindið sent til Skipulagsstofnunar og þegar þeir eru búnir að yfirfara og samþykkja afgreiðslu málsins er það sent til auglýsingar/staðfestingar í B-deild Stjórnartíðinda. Þegar erindið hefur birst þar er því endanlega lokið.


Spurning: Hvað er nýtingarhlutfall og hvernig er það reiknað út?
Svar: Nýtingarhlutfall er hlutfallið milli stærðar lóðar, eða einhvers ákveðins landsvæðis, og heildarflatarmáls allra gólfflata á lóðinni, eða á hinu tilgreinda landsvæði. Leyfilegt nýtingarhlutfall á lóð sést á deiliskipulagi sem hægt er að nálgast hjá Skipulags- og byggingarsviði að Borgartúni 12-14 og er opið alla virka daga 08:20-16:15. Dæmi um útreikninga nýtingarhlutfalls á lóð: Ef lóð er 1000 fermetrar (m2) og á því stendur tveggja hæða hús, þar sem gólf beggja hæða, mælt útfyrir útveggi (heildarflatarmál) er 500m2 , verður nýtingarhlutfall (N): 500/1000 = 0,5. Ef húsið er 4 hæðir og samanlögð gólf hússins eru 1000 m2 verður nýtingahlutfallið, (N) ; 1000/1000 = 1.0.


Spurning: Ný byggingarsvæði í Reykjavík? Hvar eru þau?
Svar: Hringja í skiptiborð skipulags- og byggingarsviðs, sími 411 1111 og biðja um skjalavörð eða ritara skipulagsstjóra.


Spurning: Hvar koma verslanir, skóli, grunnskóli, leiksvæði o.sv.frv. í nýjum hverfum?
Svar: Það sést á deiliskipulagi hvar þessa þjónustu verður að finna í nýjum og nýlegum hverfum. Hægt er að skoða samþykktar skipulagsáætlanir frá 2002 og nýrri á vefnum, sjá hér. Ef ekkert finnst þar er best fyrir borgarbúa að fara í þjónustuver borgarinnar, Borgartúni 12-14 og biðja um skjalavörð sviðsins til að fá að skoða deiliskipulagsuppdrætti. Skipulags- og byggingarsvið er til húsa í Borgartúni 12-14.


Spurning: Granni leggur bílnum sínum alltaf fyrir framan húsið hér. Er hægt að merkja sér bílastæði?
Svar: Já, ef það er séreign, annars ekki. Ef bílastæði er merkt á mæliblaði (sem fæst hjá mælingardeild) innan lóðar húseignar er það í eigu þess aðila og þeir mega sérmerkja eins og þeir vilja. Ef aftur á móti stæði er utan lóðar er það í eigu borgarinnar og allir mega leggja þar. Við fjölbýlishús eru sömu reglur, kemur fram á mæliblaði hvar lóðarmörk eru og hversu mörg bílastæði tilheyra húsinu. Ef deilur eru milli húseigenda og/eða annarra (t.d næstu hús) hver má leggja hvar og svoleiðis eru það innanhússmál þeirra sjálfra. Borgin skiptir sér ekki af því. Íbúar mega sérmerkja stæði við fjölbýlishús en það verða allir íbúar að samþykkja það.