Þjónustumiðstöð Miðborgar og Hlíða er ein af sex þjónustumiðstöðvum í Reykjavík. Við þjónustumiðstöðina starfa um 260 manns. Framkvæmdastjóri er Sigtryggur Jónsson.

Hverfisráð Miðborgar og Hverfisráð Hlíða halda fundi sína í þjónustumiðstöðinni.
Hlutverk þjónustumiðstöðvarinnar er að veita þverfaglega og samræmda þjónustu til íbúa í Miðborg og Hlíðum um persónuleg málefni, ráðgjöf við starfsfólk leik- og grunnskóla og aðra faglega þjónustu til stofnana og félagasamtaka í hverfunum.  Þjónustumiðstöðin er þekkingarstöð í fjölmenningu og margbreytileika og hefur á að skipa starfsfólki, sem er sérhæft í málefnum útlendinga og minnihlutahópa.

Með þverfaglegri og samræmdri þjónustu vonumst við til að geta veitt íbúum Miðborgar og Hlíða góða og markvissa þjónustu.  Á þjónustumiðstöðinni er mikil áhersla lögð á öflugt samstarf við aðrar stofnanir og félagasamtök í hverfunum.  Má þar nefna grunn- og leikskóla, félagsmiðstöðvar, lögreglu, íþróttafélög og kirkjur svo eitthvað sé nefnt.