Græna hliðin
Spurning um að taka skrefið
Ingibjörg Margrét Gunnlaugsdóttir verkefnisstjóri á Leikskólaskrifstofu í Borgartúni 12-14. Hún starfaði áður sem leikskólakennari og er með diplómapróf í stjórnun menntastofnana. Vinnustaður er nýtt Skóla- og frístundasvið Reykjavíkurborgar.
„Mér líst mjög vel á verkefnið Græn skref í starfssemi borgarinnar,“ segir Ingibjörg, eitt er að setja stefnu og annað að þróa aðferð til að miðla henni til allra og festa í sess, það gerir þetta verkefni.
Ingibjörg segir að verkefnið og vefurinn Græn skref í starfseminni sé mjög skýrt, aðgengilegt og skemmtilegt. „Það er gott að skipta þessu niður í afmörkuð verkefni en gefa fólki um leið kost á að taka hvert skref í stærra samhengi,“ segir hún og að einnig sé þægilegt að þátttakan sé sjálfvalin og að hver vinnustaður geti farið á sínum hraða.
Ingibjörg segir að starfsfólk á nýju Skóla- og frístundasviði séu ekki nýgræðingar í grænu málunum heldur hafi fólk ýmsa góða reynslu til dæmis í úrgangsmálum. „Þegar við fluttum í Borgartún vildum við taka upp nýja siði og leituðum til Umhverfis- og samgöngusviðs og fengum góðar leiðbeiningar,“ segir hún.
Hún segir að um sextíu manns noti litlu kaffistofuna þeirra á fimmtu hæðinni en það hafi gengið mjög vel, þar eru engin einnota mál og flokkun í fullum gangi. Enginn starfsmaður er með ruslafötu við skrifborðið sitt heldur fer allt beina leið í flokkunarkerfið í eldhúsinu.
„Grænu skrefin bíða okkar allra, bæði á heimilum og vinnustöðum og það er gott að byrja á vinnustaðnum, það skilar sér svo örugglega inn á heimilin líka. Þetta er framtíðin og um að gera að byrja bara strax, þetta er spurning um að taka skrefið,“ segir Ingibjörg og hvetur vinnustaði til að skrá sig á vefnum www.reykjavik.is/graenskref.