Um verkefnið
Verkefnið Græn skref í starfsemi Reykjavíkurborgar snýst um að efla vistvænan rekstur í starfsemi borgarinnar ásamt því að skapa fordæmi í því að minnka umhverfisáhrif sveitarfélagsins með kerfisbundnum hætti. Verkefnið er innblásið frá umhverfisstjórnunarkerfi Harvard háskóla í Bandaríkjunum sem nefnist Green Office og er ætlað að minnka neikvæð umhverfisáhrif háskólans.
Framkvæmd verkefnisins er einföld og aðgengileg og allir vinnustaðir á vegum Reykjavíkurborgar geta tekið þátt. Verkefnið hófst formlega í október 2011.
Fjögur skref - níu umhverfisþættir
Umhverfisstjórnunarkerfið Græn skref byggist á fjölmörgum aðgerðum sem snerta níu þætti sem hafa áhrif á umhverfið og innleidd í fjórum áföngum. Öllum vinnustöðum borgarinnar býðst að tileinka sér þessar aðgerðir og hafa þannig jákvæð áhrif á umhverfið, bæta starfsumhverfi starfsmanna sinna og draga úr rekstrarkostnaði.
Markmið verkefnisins er að:
-
Gera starfssemi Reykjavíkurborgar umhverfisvænni
-
Auka vellíðan starfsmanna og bæta starfsumhverfi þeirra
-
Draga úr kostnaði í rekstri Reykjavíkurborgar
-
Innleiða áherslur í umhverfismálum sem þegar hafa verið samþykktar
-
Vinnustaðir fái viðurkenningu fyrir metnað sinn í umhverfismálum
-
Vinnustaðir borgarinnar geti innleitt aðgerðir á mismunandi hátt eftir umfangi og eðli starfsseminnar
-
Aðgerðir Reykjavíkurborgar í umhverfismálum séu sýnilegar
-
Reykjavíkurborg verði fyrirmynd annarra í umhverfismálum
Samráðsnefnd
Verkefnið er unnið þvert á fagsvið borgarinnar og yfir verkefninu situr 12 manna samráðsnefnd. Samráðsnefndin vinnur að þróun verkefnisins og í samráðsnefndinni sitja:
Hjá Reykjavíkurborg starfa rúmlega 8000 manns og er borgin einn af stærstu vinnustöðum landsins. Reksturinn er umfangsmikill og hefur umtalsverð umhverfisáhrif, bæði vegna athafna starfsmanna og vegna tengdrar þjónustu sem borgin veitir. Rekstri borgarinnar fylgir losun gróðurhúsalofttegunda, meðal annars frá bílum, meðhöndlun úrgangs og ýmsum verkframkvæmdum. Einnig hefur borgin óbein áhrif á losun gróðurhúsalofttegunda, meðal annars í gegnum ákvarðanir sem snerta innkaup. Starfssemi Reykjavíkurborgar fylgir losun efna sem hafa áhrif á loftgæði, má þar til dæmis nefna við akstur bíla, malbikun og ýmislegt viðhald.
Með virkri umhverfisstjórnun og með kaupum á vistvænum vörum og þjónustu má skapa markað fyrir slíkar vörur og draga verulega úr neikvæðum umhverfisáhrifum af starfsemi borgarinnar.
Samkvæmt ályktun Heimsráðstefnu Sameinuðu þjóðanna um umhverfi og þróun í Rio de Janeiro árið 1992 ber öllum sveitarstjórnum heims að gera áætlun um hvernig sveitarfélagið getur nálgast markmiðið um sjálfbæra þróun. Þessi áætlun gengur undir nafninu Staðardagskrá 21 (Local Agenda 21). Hún er fyrst og fremst velferðaráætlun sem tekur til þriggja megin sviða sjálfbærrar þróunar, þ.e. efnahags-, samfélags- og umhverfismála.
Fyrsta útgáfa Staðardagskrár 21 fyrir Reykjavík var samþykkt í borgarstjórn Reykjavíkur í febrúar 2001. Önnur útgáfa Staðardagskrár 21 fyrir Reykjavík kom út undir heitinu Reykjavík í mótun og er stefnumótun í átt að sjálfbæru samfélagi í Reykjavík til 2015.
Framtíðin liggur í loftinu er loftslags- og loftgæðastefna Reykjavíkur og var samþykkt í borgarstjórn Reykjavíkur í september 2009. Meginmarkmið hennar er að draga úr losun gróðurhúsalofttegunda og bæta loftgæðin í borginni. Reykjavíkurborg steig fyrst allra sveitarfélaga á Íslandi fram með slíka stefnu. Með stefnumörkun í loftslagsmálum í Reykjavík var stigið mikilvægt skref í innleiðingu tíundu Álaborgarskuldbindingarinnar sem Reykjavíkurborg hefur staðfest.
Með stefnumörkun og markmiðasetningu vill Reykjavíkurborg leggja sitt af mörkum til sjálfbærrar þróunar með því að hrinda í framkvæmd Staðardagskrá 21 ásamt því að standa við alþjóðlegar skuldbindingar.