Sólin skín á Sunnufold
18.01.2012
Upplestur á frétt 
Nýr sameinaður leikskóli í Foldahverfi hefur fengið nafnið Sunnufold. Leikskólinn tók til starfa síðastliðið sumar, en hann sameinar þrjá leikskóla í Foldahverfi í Grafarvogi; Foldaborg, Foldakot og Funaborg. Efnt var til samkeppni meðal starfsfólks, foreldra og barna um nafn á nýja skólann og bárust á annað hundrað tillögur.
Í umsögn nafnanefndar segir m.a. að allar starfsstöðvar nýja leikskólans standi í sömu hlíð á móti suðri og því fari vel á því að kenna sameinaðan skóla við sunnu. Jafnframt segir í umsögn að Foldahverfið hafi jafnan verið talinn einn sólríkasti staðurinn í borgarlandinu.
Valgerður Anna Þórisdóttir er leikskólastjóri í Sunnufold þar sem eru um 130 börn.