Reykjavíkurborg styrkir blómlegt menningarlíf

18.01.2012

Upplestur á frétt 

• 1

Frá afhendingu styrkjanna í Tjarnarbíói nú síðdegis.

• Senda
• Prenta
• Senda á Facebook

Styrkveitingar menningar- og ferðamálaráðs Reykjavíkurborgar og úthlutanir til Borgarhátíðarsjóðs og Tónlistarhóps Reykjavíkur 2012 voru tilkynntar í Tjarnarbíói í dag.

Einar Örn Benediktsson, formaður menningar- og ferðamálaráðs Reykjavíkurborgar, tilkynnti í Tjarnarbíói í dag um styrkveitingar borgarinnar til menningarmála 2012 og úthlutanir úr nýstofnuðum Borgarhátíðasjóði.  Framlagið nemur samtals 92,5 milljónum króna.

Borgarhátíðarsjóður er nýmæli sem borgarstjórn samþykkti við gerð fjárhagsáætlunar 2012 og er hluti af styrkveitingum menningar- og ferðamálaráðs. Megintilgangur hans er að styðja við fasta árlega viðburði og örva nýsköpun í  hátíðahaldi í Reykjavíkurborg í samræmi við nýja ferðamálastefnu borgarinnar.  Sjóðnum er heimilt að gera samstarfssamninga til allt að þriggja ára og hljóta nú átta hátíðir, sem taldar eru skipta verulegu máli í að efla Reykjavík sem eftirsóknarverðan áfangastað ferðamanna, þannig samning.

Tónlistarhátíðin  Iceland Airwaves fær 10 m.kr. á árinu 2012, Alþjóðleg kvikmyndahátíð - RIFF 9 m.kr , Hönnunarmars 5 m.kr., Jazzhátíð í Reykjavík 3 m.kr. og 2 m.kr. hver fá Blúshátíð í Reykjavík, Bókmenntahátíð í Reykjavík, Myrkir músikdagar og Food&Fun. Samtals 35 milljónir króna árið 2012. Framlög árin 2013 og 2014 eru með fyrirvara um samþykkt fjárhagsáætlunar hverju sinni.  Hátíðirnar Gay Pride og Hestadagar í Reykjavík njóta þegar 3ja ára samnings af styrkveitingum borgarráðs. Reykjavíkurborg hefur styrkt allt að 30 hátíðir árlega og eftir sem áður geta aðrar hátíðir notið almennra styrkja.

Menningar- og ferðamálaráð byggir ákvörðun sína um styrki á niðurstöðu fagnefndar sem tilnefnd var af Bandalagi íslenskra listamanna. Nefndin hafði 204 umsóknir til umfjöllunar og alls var sótt um rúmar 300 m.kr. Ráðið samþykkti að veita 88 styrki - samtals kr. 57,5 m. kr.

Lúðrasveitin Svanur, Lúðrasveit verkalýðsins og Lúðrasveit Reykjavíkur fengu allar tilnefninguna Tónlistarhópur Reykjavíkur 2012 og hver um sig 700 þús. kr styrk. Lúðrasveitir borgarinnar setja reglulega svip á borgarlífið og sinna mikilvægu tónlistaruppeldi.

Nýlistasafnið hlaut stærsta verkefnastyrkinn 5,7 m.kr.  Það sinnir framsæknu sýningarhaldi þar sem áhersla er lögð á að endurspegla breidd og sköpunarkraft íslenskra myndlistarmanna og kynna helstu strauma og stefnur í alþjóðlegri myndlist.

Heimili kvikmyndanna - Bíó Paradís hlaut 5,5 m.kr. Markmið starfseminnar er að efla kvikmyndamenningu og auka til muna fjölbreytni kvikmyndasýninga. Með stofnun Bíó Paradís hefur verið fyllt upp í stórt skarð í kvikmyndamenningu borgarinnar.

Aðrir styrkir

Menningar- og ferðamálaráð Reykjavíkurborgar skipa: Einar Örn Benediktsson formaður, Harpa Elísa Þórsdóttir, Eva Baldursdóttir, Stefán Benediktsson, Magnús Þór Gylfason, Áslaug María Friðriksdóttir og Davíð Stefánsson.

Ráðgefandi faghóp um styrkina skipuðu Sólrún Sumarliðadóttir formaður, Gunnar Hrafnsson, Lárus Ýmir Óskarsson, Randver Þorláksson og Þóra Þórisdóttir.