Fjölbýlishús
Í fjölbýlishúsum bera íbúar sameiginlega ábyrgð á sorpgeymslum.
Ef þú óskar eftir breytingum á fjölda eða tegundum tunna í sameign hefur það áhrif á gjöld allra í húsinu. Slíkar ákvarðanir þarf því að taka í samráði við aðra íbúa.
Fjöldi og tegundir tunna
Í fjölbýli þarf meirihluti eigenda að samþykkja allar breytingar á sorptunnum. Sorphirðugjöld eru rukkuð eftir fjölda og tegundum tunna og hafa breytingar á samsetningu því áhrif á alla íbúa hússins.
Fulltrúi húsfélags getur pantað eða skilað tunnum fyrir hönd íbúa á mínum síðum.
Þótt ekki sé gerð krafa um slíkt í umsóknarferli er best að skriflegt samþykki, svo sem fundargerð, liggi fyrir áður en sótt er um breytingar.
Öll bera ábyrgð!
Húsfélög og eigendur íbúða í fjölbýlishúsum bera sameiginlega ábyrgð á flokkun úrgangs. Röng flokkun getur haft aukinn kostnað í för með sér og lendir sá kostnaður því á öllum íbúum.
Ef einn eigandi verður ítrekað uppvís að því að flokka ekki rétt getur húsfélagið endurkrafið hann um kostnaðinn samkvæmt almennum reglum kröfuréttar. Húsfélag getur einnig sett húsreglur um flokkun á sorpi. Ef eigandi brýtur reglurnar ítrekað getur húsfélagið lagt bann við búsetu eða dvöl hans í húsinu.
Nánari upplýsingar um réttindi og skyldur eiganda má nálgast í lögum um fjöleignarhús.
Skipting kostnaðar sorphirðu í fjölbýlishúsum
Gjöldum fyrir heimilissorp í fjölbýlishúsum er skipt eftir hlutfallstölu eigenda í viðkomandi sameign. Hlutfallstalan er byggð á flatarmáli eignarhluta hvers eiganda og má finna upplýsingar um slíka skiptingu í eignaskiptayfirlýsingu.
Húsfélögum er heimilt skv. lögum að skipta sameiginlegum kostnaði eftir öðrum reiknireglum en slíkur samningur getur þó ekki tekið til sorphirðugjalda. Sorphirðugjöld eru innheimt með fasteignagjöldum sem byggja á hlutfallstölu eigenda.
Ósamkomulag íbúa vegna sorphirðu
Ósætti getur komið upp milli íbúa fjölbýlishúsa vegna breytinga sem hafa ekki verið samþykktar eða íbúa sem fylgja ekki reglum um flokkun. Slíkt ósætti er þó alltaf á ábyrgð íbúa og getur Reykjavíkurborg ekki stigið inn í slík mál.
Hafðu samband
Ábendingar er varða þjónustu Sorphirðu Reykjavíkur má senda í gegnum ábendingavef Reykjavíkurborgar
Sími þjónustuvers Reykjavíkurborgar er 411 1111
Netfang: upplysingar@reykjavik.is
