Gjöld og niðurgreiðslur

Leikskólagjöld eru innheimt fyrirfram með kröfu í netbanka. Gjalddagi leikskólagjalda er 1. hvers mánaðar og eindagi 30 dögum síðar. Reykjavíkurborg niðurgreiðir hluta leikskólagjalda en annað er greitt samkvæmt gjaldskrá.

Hvað kostar að vera í leikskóla?

Gjaldskrá leikskóla Reykjavíkur skiptist í tvo flokka sem taka mið af fjárhagsstöðu foreldra og forsjáraðila. Upphæðin veltur á því hversu lengi barnið er í leikskólanum á hverjum degi. Einnig greitt fyrir hluta kostnaðar við máltíðir.

Skiptingin er svona
Flokkur 1 – Giftir foreldrar, sambúðarfólk og annað foreldri í námi.
Flokkur 2 – Þeir sem hafa sótt um afslátt sem; Einstæðir foreldrar, báðir foreldrar í námi, annað eða báðir foreldrar öryrkjar eða á endurhæfingarlífeyri TR og starfsfólk leikskóla Reykjavíkur.

Þarf að borga leikskólagjöld þegar leikskólinn er lokaður?

Leikskólagjöld greiðast ellefu mánuði á ári. Ef leikskóla barns þíns er einhverra hluta vegna lokað í lengri tíma eru leikskólagjöld ekki innheimt fyrir þann tíma. 

Hver getur fengið afslátt af leikskólagjöldum?

Foreldrar í námi, einstæðir foreldrar, öryrkjar og starfsfólk leikskóla Reykjavíkurborgar geta sótt um afslátt af leikskólagjaldi. Einnig er veittur afsláttur vegna veikinda barns og ef tvö systkini eða fleiri eru í leikskóla í borginni. Afslátturinn á einnig við um sjálfstætt starfandi leikskóla.

Hvað gerist ef ég greiði ekki leikskólagjöldin?

Ef leikskólagjöld eru ekki greidd fer af stað innheimtuferli vegna vanskila og barn gæti átt á hættu að missa leikskólaplássið.

Leikskólagjöld ógreidd

10 dögum eftir eindaga: Greiðandi fær sent ítrekunarbréf.
50 dögum eftir gjalddaga: Krafan færð í milliinnheimtu. Þegar krafa hefur verið send innheimtufyrirtæki er hægt að semja um skuldina þar.
120 dögum eftir gjalddaga: Krafa færð í löginnheimtu.

Ef greitt er eftir eindaga þarf greiðandi líka að borga dráttarvexti af leikskólagjöldunum. Kostnaður vegna útsendingu ítrekunarbréfa og innheimtu fellur einnig á greiðanda.

Hvenær má Reykjavíkurborg segja upp dvalarsamningi barns?

Reykjavíkurborg hefur leyfi til þess að segja upp dvalarsamningi barna ef leikskólagjöld hafa ekki verið greidd 110 dögum frá gjalddaga. Skuldin þarf ekki að vera vegna viðkomandi barns, svo lengi sem krafan uppfyllir framangreint 110 daga skilyrði. Uppsögn miðast við mánaðamót og er uppsagnarfrestur einn mánuður.

Ef barn sem er byrjað í leikskóla nýtir ekki leikskólaplássið í tvo mánuði án skýringa er heimilt að segja upp dvalarsamningi barnsins. Uppsögn miðast við 1. eða 15. hvers mánaðar og er uppsagnarfrestur einn mánuður.

Viltu frekar fá greiðsluseðil?

Ef þú vilt frekar fá sendan greiðsluseðil getur þú haft samband við þjónustuver Reykjavíkurborgar í Borgartúni 12-14, í síma 411 1111, á netspjalli og í gegnum netfangið upplysingar@reykjavik.is.

Getum við aðstoðað?

Þarftu frekari aðstoð eða fannstu ekki það sem þú varst að leita að? Þjónustuver borgarinnar getur aðstoðað þig í síma 411 1111, á netspjalli og í gegnum netfangið innritun.leikskolar@reykjavik.is.