Djúpgámar
Við stærri fjölbýlishús, fjölbýlishúsakjarna og húsabyggð þar sem þéttleiki er mikill geta djúpgámar verið hagkvæm lausn.
Hluti gámsins, þar sem sorp safnast, er neðanjarðar og tekur því minna pláss en aðrar lausnir.
Áður en hægt er að setja upp djúpgáma þarft þú að hafa samband við skipulagsfulltrúa.
Hvað eru djúpgámar?
Djúpgámar eru gámar þar sem sá hluti gámsins sem safnar úrganginum er neðanjarðar. Henta þeir því sérstaklega vel þar sem þéttleiki byggðar er mikill og við stærri fjölbýlishús eða fjölbýlishúsakjarna.
Sá hluti gámanna sem er ofanjarðar getur verið mismunandi að ummáli og hæð. Á honum er op sem íbúar nota til að setja úrgang í gáminn og lúga sem notuð er til að tæma hann.
Gott að hafa í huga varðandi stærð djúpgáma
Sorpflokkurinn sem hver gámur tekur við getur breyst með tímanum. Því er mælt með að velja op sem henta fleiri en einum sorpflokki. Ekki er hægt að samþykkja hálfniðurgrafna gáma úr plasti.
Lóðarhafi ber ábyrgð á að gámarnir rúmi það sorp sem fellur til í húsnæðinu. Þegar fjöldi og stærð gáma eru ákveðin þarf að tryggja pláss fyrir nægilega marga gáma þar sem erfitt getur verið að fjölga þeim síðar. Ef gámarnir yfirfyllast getur rusl safnast upp í kringum þá.
Staðsetning og fjöldi djúpgáma
Djúpgámar skulu vera á lóð byggingarinnar og standa saman í þyrpingu. Aðgengi að öllum gámunum skal vera það sama, en bæta má sérstaklega aðgengi að gámum fyrir endurvinnsluefni.
Fjöldi gáma og nákvæm staðsetning fer eftir fjölda íbúða. Að jafnaði skulu ekki vera meira en 75 metrar frá inngangi byggingar að gámunum.
Í gróinni byggð getur þurft að hanna aðgengi íbúa og losunarbíla að gámunum fyrir fram.
Í undantekningartilfellum má setja djúpgáma á svokallaða fylgilóð, sem tengist lóð fasteignarinnar. Til þess þarf að sýna fram á, með sérstökum rökstuðningi, að ekki sé hægt að koma gámunum fyrir á lóð fasteignarinnar. Sami eigandi þarf að eiga báðar lóðirnar.
Skrifstofa umhverfisgæða Reykjavíkurborgar þarf að samþykkja endanlega gerð gáma, staðsetningu þeirra og aðkomu til tæmingar.
Kostnaður og ábyrgð á viðhaldi djúpgáma
Lóðarhafi ber kostnað og ábyrgð á kaupum og rekstri gáma, framkvæmdum við þá og frágangi í kringum þá. Þetta nær til kassa, gáma, lúga og annars tengds búnaðar.
Lóðarhafi sér einnig um viðhald gáma og búnaðar, þrif og umhirðu svæðisins. Þrífa þarf lúgur og öryggispalla og tæma vatn úr steyptum kössum gámanna.
Ef þrifum eða umgengni er ábótavant getur Reykjavíkurborg neitað að tæma gámana. Ef lóðarhafi sinnir ekki áskorun um hreinsun getur borgin látið hreinsa á hans kostnað.
Hafðu samband
Ábendingar er varða þjónustu Sorphirðu Reykjavíkur má senda í gegnum ábendingavef Reykjavíkurborgar
Sími þjónustuvers Reykjavíkurborgar er 411 1111
Netfang: upplysingar@reykjavik.is
